"HERIOTZA BIKOITZA" ANTZEZLANA MAIATZAREN 27 AN ITSAS ETXEAN

Mai, 2018 Hondarribia, antzerkia, Itsas Etxea

Salgai dira maiatzaren 27an “Heriotza bikoitza” antzerkia ikusteko sarrerak. Apirilaren 1erako iragarrita zegoen antzezlana, baina arrazoi teknikoak tarteko, bertan behera utzi behar izan zuten. Kultura Sailak jakinarazi duenez, ordurako sarrera zuen orok mantentzen du oraingoan ere joateko aukera, baina inork sarrerari dagokion zenbatekoa itzultzea nahi badu departamentuarekin harremanetan jar daiteke.

Eneko Sagardoy eta Miren Gaztañaga dira antzezlaneko aktoreak. Bizitza eta heriotza dituzte hizpide, fikzio eta errealitate arteko mugan jardungo dira. Lehenak ikusgarritasun berezia eskuratu du orain gutxi Aktore Berri Onenaren Goya Saria eskuratu baitzuen “Handia” filman egindako lanagatik. Irundarra, berriz, zineman eta bereziki antzerkian ibilbide luzea egindakoa da, jada. Mikel Zumeta herriko semeak gidatu du dramaturgia.

Sarrerak Kutxabanken webgunean, Arma Plazako Turismo Bulegoan edota, antzerkiaren egunean bertan, emanaldia baino bi ordu lehenago Itsas Etxeko txarteldegira jota eskura daitezke.

SINOPSIA

Heriotzari eta bizitzari, bizitzari eta heriotzari edo bizirik hiltzeari eta heriotzaren ostean zabaltzen diren ateei buruzko hausnarketa da Heriotza bikoitza (Doble malta).

Fikzioak eta errealitateak leku bera partekatzen duten lerro finean dihardute aktore bik, lehenengo pertsonan hitz eginda, mintzaira poetikoa erabilita, absurdoa tarteka eta performatiboa berez. Gorputzak, soinu-giroak eta eta irudiak elkarren gainean jartzen dira, eszena bizitzaren eta heriotzaren puskekin betez.

Zer gertatzen da bizitzaren bidea amaitzen denean?

Webgune honek gure cookie-ak eta hirugarrenenak erabiltzen ditu zure nabigazio egokitzeko eta analitika lanak egiteko. Jarraituz gero, ulertzen dugu erabilera onartzen duzula. Cookie-en politika